لوګر پوهنتون کې د قرآن کريم د حفظ او تجويد د فراغت په پار، د ځوان نسل فکري روزنې کتاب سيالۍ د پايلو اعلانولو او د پوهنتون په کچه د مخکښو محصلانو د ستاینې غونډه ترسره شوه.
سه شنبه: د ۱۴۰۴ کال عقرب/ لړم ۲۰مه او د ۱۴۴۷ جمادی الاول ۲۰مه نېټه.
لوګر پوهنتون کې د قرآن کريم د حفظ او تجويد د فراغت په پار، د ځوان نسل فکري روزنې کتاب سيالۍ د پايلو اعلانولو او د پوهنتون په کچه د مخکښو محصلانو د ستاینې غونډه د دغه ولايت د مرستيال والي، د پوهنتون رهبري، د ولايتي ادارو يو شمېر مسؤلينو، د څلورګونو پوهنځيو د استادانو او محصلانو په ګډون ترسره شوه.
د غونډې پيل د قرآن کريم د څو مبارکو آيتونو تر تلاوت وروسته د دغه پوهنتون د رئيس مفتي سيدضياءالاحمد صارم په خبرو وشو. ښاغلي صارم د ځوانانو او محصلانو د علم حاصلولو او لوړو زده کړو ترسره کولو اساسي موخه د الله تعالی رضا وښوده او ویې ويل، چې په يادې چارې سره بايد د اسلامي امت او ټولني ښه خدمت وشي. ښاغلي صارم همدا راز وويل، چې ښه او قوي علم هغه دی، چې عمل ورباندې وشي او ګټه يې نورو ته ورسيږي. د ښاغلي صارم په خبره هيواد مو له خورا ناخوالو را تېر شوی او اوس يې وخت دی، چې د حاکم اسلامي نظام په رڼا کې یې د دیني او عصري علومو د زده کړې پر مټ ښه خدمت وکړو.
له دې سره مل د لوګر مرستيال والي الحاج مولوي محمد انور دين پرور په خپلو خبرو کې د داسې وياړمنو غونډو پر جوړېدو خوښي وښوده او زياته يې کړه، چې په هر ځل راتګ سره يې لوګر پوهنتون له نويو نوښتونو او پرمختګونو سره مل وي. ښاغلي مرستيال والي زياته کړه، چې اوس د ديني او عصري زده کړو تر منځ واټن نشته او ښه مثال يې په دغه پوهنتون کې د عصري زده کړو سربېره د قرآن کريم له حفظ تجويد او ناظرې دورو څخه د محصلانو فراغت دی.
ورپسې د دغه پوهنتون د علمي او محصلانو چارو مرستیال پوهندوی مولوي ميرويس ستانکزي د علم پر ارزښت خبرې وکړې او د انساني شخصيت جوړونې، پرمختګ او تاريخي ياد او بنسټ جوړونې راز يې د ديني او عصري علومو په زده کړه کې نغښتی وباله.
ورته مهال د لوګر ولايت د اطلاعاتو او کلتور رئيس مولوي فيض الله جوهري، د ښوونې او روزنې پوهنځي استاد پوهنيار مولوي محمد نذیر محمدي هم د ديني او عصري زده کړو په ارزښت هر اړخيزې خبرې وکړې.
د يادې غونډې وروستۍ شېبې د قرآن کريم د مبارکې ختمانې، حافظانو او قاريانو ته د دستورونو ورپه سرکولو، مخکښو او د ترسره شوې سيالۍ برياليو محصلانو ته د ډاليو او ستاينپاڼو په ورکولو سره رنګينې او د لوګر پوهنتون د مالي او اداري مرستيال مولوي فضل الربي مصطفی لخوا د دعاوې په لوستلو سره پای ته ورسېدې.
د نشرلتو، اړيکو او عامه پوهاوي عمومي مدیریت.
