لوګر د لوړو زده کړو موسسه کې د نوي جوړېدونکي جومات د جوړېدو چارې په چټکۍ روانې دي!
چهار شنبه: د ۱۴۰۴ کال حمل/ وري ۱۱مه او د ۱۴۴۶ شوال المکرم ۲۰مه نېټه.
لوګر د لوړو زده کړو موسسه کې د نوي جوړېدونکي جومات د جوړېدو چارې په چټکۍ روانې او نږدې ۵۰ سلنه یې ترسره شوي دي.
دغه لوی جومات، چې په یو وخت به د شاوخوا (۲۰۰۰) لمونځ کوونکو لپاره بسنه کوي د هیواد د یو تن ملي سوداګر الحاج محمد میرزا کټوازي لخوا د نوموړي په شخصي مالي لګښت جوړيږي. یاد جومات چې په څنګ کې به د اودسونو لپاره ځانګړي ځایونه، د سړو او تودو اوبو منظم سیستم، د جومات اړخونو ته منظمه شنه شاحه/ تفریحي پارک او ورسره په خواکې د زده کړیالانو لپاره ځانګړی او معیاري کتابتون هم ولري، د قراردادي شرکت د مسؤلینو په خبره، چې د روان ۱۴۰۴ کال تر نیمایي به یې چارې بشپړې او ګټې اخستنې ته وسپارل شي.
ورته مهال لوګر د لوړو زده کړو موسسې رییس مولوي ضياءالاحمد صارم د یاد جومات د جوړېدو له چارو د لیدنې پر مهال له اړوندو کارکوونکو د مننې او هڅونې تر څنګ له دوی څخه په کارونو کې د پوره اخلاص هیله وښوده.
د نشراتو، اړیکو او عامه پوهاوي لوی مدیریت
