لوګر د لوړو زده کړو موسسې او د کابل پوهنتون د درمل جوړونې پوهنځي استادانو او زده کړیالانو د لوګر ولایت برکي برک ولسوالۍ اړوند سجاوند درې ته علمي سفر تر سره کړ!
یکشنبه: د ۱۴۰۴ کال ثور/ غویي ۲۱مه او د ۱۴۴۶ ذوالقعده ۱۳مه نېټه.
لوګر د لوړو زده کړو موسسې د کرنې پوهنځي استادانو او د کابل پوهنتون د درمل جوړونې پوهنځي د فارماکوګنوزي څانګې استادانو او زده کړیالانو د لوګر ولایت برکي برک ولسوالۍ اړوند سجاوند درې ته د طبي نباتاتو د پېژندنې په موخه علمي سفر تر سره کړ.
یاد علمي سفر تېره اونۍ د کابل پوهنتون د درمل جوړونې پوهنځي د فارماکوګنوزي څانګې آمر پوهندوی عبدالغني کریمي، استاد پوهاند محمد نسیم صدیقي او پوهنیار عدالروف وزیري د یادې څانګې زده کړیالانو او لوګر د لوړو زده کړو موسسې د کرنې پوهنځي رییس پوهنیار سید حفیظالله حیات او د اګرانومي څانګې د طبي نباتاتو مضمون استاد پوهنیار شفیقالله بختیا په ملتیا ترسره شو.
د یاد سفر د مسؤلینو په خبره، له دغه علمي-څېړنیز سفر څخه یې موخه د سجاوند درې په سیمه کې د طبیعي نباتاتو پېژندنه وه. دوی زیاتوي، چې د یادې ساحې د علمي سفر په ترڅ کې ۱۹ ډوله ارزښتناک طبی نباتات وپیژندل شول، چې د درمل جوړونې او درملیزو ګټه اخیستنو له پلوه خورا مهم ارزښت لري. د دوی په خبره دغه موندنې ښيي، چې لوګر ولایت د طبی نباتاتو له پلوه د هیواد له بډایه سیمو څخه شمېرل کېږي.
ورته مهال د یاد علمي ګډ سفر په ترڅ کې لوګر د لوړو زده کړوموسسې د کرنې پوهنځي او کابل پوهنتون د درمل جوړونې پوهنځي د فارماکوګنوزي څانګې د رهبري او استادانو لخوا د علمي همکاریو په موخه یو شمېر دوه اړخیزې ژمنې هم وشوې، چې له مخې به یې د دغو دواړو تحصیلي مرکزونو تر منځ په اړوندو برخوکې د طبي نباتاتو د سرچینو تثبیت او تبادلو، علمي لارښوونو او مرستو، کتابتوني او سرچینو مرستو، بینالادارتي ساینسي سفرونو او ګډو څېړنو او همدا راز د درملیزو نباتاتو بانک جوړولو په برخو کې ګډې همکارۍ کیږي.
دغه علمي سفر په داسې حال کې ترسره کیږي، چې له دې وړاندې هم لوګر د لوړو زده کړو موسسې کرنې پوهنځي زده کړیالانو د هیواد په کچه د غلو-دانو یوشمېر تولیدي شرکتونو او همدا راز حیواني تجارتي فارمونو ته د مسلکي او علمي څېړنو په موخه رسمي سفرونه ترسره کړي دي.
د نشراتو، اړیکو او عامه پوهاوي عمومي مدیریت.
