لوګر د لوړو زده کړو موسسه کې (د سیاسي مکتبونو پېژندنه؛ د اسلام مبارک دین او سیکولرېزم پېژندنه) تر سرليک لاندې روزنیز او معلوماتي سمینار وړاندې شو.
چهارشنبه: د۱۴۰۳ کال قوس/ليندۍ ۱۴مه او د ۱۴۴۶ جمادی الثاني ۲مه نېټه.
لوګر د لوړو زده کړو موسسه کې (د سیاسي مکتبونو پېژندنه؛ د اسلام مبارک دین او سیکولرېزم پېژندنه) تر سرليک لاندې روزنیز او معلوماتي سمینار د ځوان او نوموتي لیکوال استاد دادمحمد ناوک لخوا وړاندې شو.
د یاد سمینار ګډونوال لوګر د لوړو زده کړو موسسې رهبري، استادان، د لوګر ولايت د اطلاعاتو او کلتور رییس، د دغې موسسې زده کړيالان او د لوګر ولايتي ادارو یو شمېر نظامي او ملکي مسؤلین وو.
په پيل کې د دغې موسسې رییس مولوي ضیاءالاحمد صارم ښاغلی استاد دادمحمد ناوک د فکري روزنې په برخه کې ځوان او زړه سواند استاد او کادر یاد کړ او د ښاغلي استاد ناوک دا ډول خدمت يې پر ځوانانو لويه پېرزوينه یاده کړه. ورپسې ښاغلي استاد دادمحمد ناوک د اسلام او سیکولرېزم په اړوند ترتیب شوی سمينار وړاندې کړ. ښاغلي ناوک سیکولرېزم يوه فکري پدیده یاده کړه او په وینا يې چې یاده پدیده د اسلام له مبارک دین سره خورا زیات توپير او جلاوالی لري. نوموړي همدا راز په خپل سمینار کې وويل، چې د اسلام مبارک دین بشر ته هر اړخیز حقوق په بشپړ ډول ورکړي؛ خو په سیکولرېزم کې دا هر څه بل ډول دي. د استاد ناوک په خبره د انسان ذهني او روحي سکون د اسلام په مبارک دین کې دی او پر ځوانانو يې ټینګار وکړ، چې د پردیو او غربي فکرونو او دینونو تر اغېز لاندې رانشي.
د سمینار په پای کې د ښاغلي استاد ناوک لخوا د زده کړيالانو اړوندې پوښتنې هم ځواب شوې او سمینار د دعایې په لوستلو سره پای ته ورسېد.
د نشراتو، اړيکو او عامه پوهاوي لوی مدیریت.
