لوګر د لوړو زده کړو موسسې د ښوونې او روزنې رهبري خپل غوره څېړونکي وستایل!
چهارشنبه: د ۱۴۰۳ کال قوس/ليندۍ ۲۸مه او د ۱۴۴۶ جمادی الثاني ۱۶مه نېټه.
لوګر د لوړو زده کړو موسسې د ښوونې او روزنې پوهنځي رهبري د یاد پوهنځي ۶ تنه استادان د غوره څېړونکو په توګه د یوې غونډې په ترڅ کې وستایل.
دغونډې ګډونوال د یاد پوهنځي رهبري، د څانګو او مستقل آمرین او استادان وو. د ښوونې او روزنې پوهنځي رییس پوهنيار ابراهیم نوري دياد پوهنځي د پرمختګ او بريا راز د خپلو استادانو پر علمي څېړنو او لاسته راوړنو کې وښود او علمي څېړنې يې په تحصیلي او تدریسي ډګر کې يو اړين اصل ياد کړ. ورپسې د دغې موسسې د څېړنو او علمي مجلې آمر پوهندوی دکتور وحيدالله عبدالرحیم زي د ديو شمېر اصولو او تګلارو په پام کې نیولو سره د علمي څېړنو اړوند لازمې لارښوونې بیان کړې. ورته مهال د دغې موسسې د تضمین کیفیت آمر پوهنیار عبدالعزیز عابد هم په خپلو خبرو کې د استادانو لخوا علمي څېړنې د تضمین کیفیت اساسي اړخ یاد کړ او د استادانو علمي څېړنې او نوښتونه يې د ستاینې وړ وبلل.
په پای کې ۶تنو استادانو (پوهندوی دکتور وحيدالله عبدالرحیم زی، پوهنمل محمد جاوېد ستانکزی، پوهنمل محمد شریف سلطاني، پوهنیار ابراهیم نوري، پوهنمل محمد رحیم رحیمي، پوهنمل محمد طاهر خپلواک) ته، چې په ملي او نړیوالو ژورنالونو کې يې علمي څېړنيزې مقالې چاپ او خپرې شوې وې، ترتیب شوي ستاینلیکونه هم ورکړل شول.
د نشراتو، اړیکو او عامه پوهاوي لوی مدیریت.
