لوکر د لوړو زده کړو موسسې د ښوونې او روزنې پوهنځي نویو زده کړیالانو ته د ښه راغلاست غونډه ترسره شوه!
یکشنبه: د ۱۴۰۳ کال سنبله/وږي ۱۸مه او د ۱۴۴۶ ربیع الاول ۵مه نېټه.
لوګر د لوړو زده کړو موسسې د ښوونې او روزنې پوهنځي د نویو زده کړیالانو لپاره د ښه راغلاست او له پوهنتون سره د بلدتیا په موخه غونډه ترسره شوه.
په یاده غونډه کې د دغې موسسې رییس مولوي ضیاءالاحمد صارم، علمي او محصلانو چارو مرستیال پوهندوی دکتورشفیق الله شفقت، د پوهنځي رییس پوهنیار ابراهیم نوري، استادانو او زده کړیالانو ګډون درلود.
زده کړیالانو ته د دغې موسسې رییس په خپلو خبرو کې د مبارکي تر څنګ دوی ښه درس ویلو ته وهڅول او له وخت څخه یې ښې ګټې اخستنې او د استادانو پر درناوي ورته لازمې سپارښتنې وکړي. ښاغلي صارم همدا راز زده کړیالانو ته په دغه موسسه کې د اړوندو مادي امکاناتو او آسانتیاو د برابرولو ډاډ ورکړ. ورته مهال دعلمي او محصلانو چارو مرستیال هم د علم او لوړو زده کړو پر ارزښت خبرې وکړې او د انسان شخصیت جوړونه یې پر علمیت تړلې وبلل. نوموړي همدا راز په زده کړیالانو غږ وکړ، چې له تحصیل او علم حاصلولو څخه موخه باید ګران د هیواد او بیا د ټول مسلمه امت خدمت کول وي. له دې سره سم د ښوونې او روزنې پوهنځي رییس هم زده کړیالانو ته مبارکي وویله او دوی یې د پوهنتون ټولو اصولو ته یې د دوی پر پوره ژمنتیا ټینګار وکړ. د غونډې په لړ کې د ښوونې او روزنې پوهنځي د درې تنو استادانو لخوا هم د کرېډېټ سیستم تشریح، پوهنتون پېژندنې او د نظم او ډسپلین لایحې په اړوند ترتیب شوي سلایډونه تشریح شول.
باید وویل شي، چې د یادې غونډې په پای د یاد پوهنځي څلور تنه هغه زده کړیالان، چې د روان کال پسرلني سمستر کې یې لوړې نمرې ګټلې وې د پوهنځي د رهبري لخوا وستایل شول.
